Parkearen foar ynwenners

As jo in parkearfergunning of -ûntheffing oanfreegje wolle, jilde de folgjende betingsten:

• Jo stean ynskreaun yn de gemeente Ljouwert, op it adres dêr't jo in fergunning of ûntheffing foar oanfreegje wolle.
• Foar it parkearen yn it gebiet dêr't jo wenje jildt in parkearbeheining.
• De auto dêr't jo in fergunning foar oanfreegje stiet op jo namme of jo kinne in leasekontrakt of ferklearring wurkjouwer oerlizze.
• Foar elts adres wurde twa parkearfergunnings ôfjûn.
• Jo ha gjin parkeargelegenheid op eigen terrein.

In parkearfergunning of -ûntheffing is fan it stuit fan oanfraach/ferlinging ôf jildich oant en mei 31 desimber fan dat jier. Jo parkearfergunning of -ûntheffing moat alle jierren fannijs ferlinge wurde.

In parkearfergunning of -ûntheffing is bûn oan it kenteken. Dat betsjut dat, as jo yn in oare auto ride sille, it kenteken dat keppele is oan de fergunning of ûntheffing oanpast wurde moat. Ferjit by it trochjaan fan in wiziging net om in (kopy fan) jo kentekenbewiis mei te nimmen of yn te scannen.

As jo tydlik gebrûkmeitsje fan ferfangend ferfier, bygelyks om't jo eigen auto by de garaazje stiet, kinne jo soks digitaal trochjaan. Freegje yn dy gefallen wol om in ferklearring fan jo garaazje, sadat jo oantoane kinne dat jo de rjochtmijittige brûker fan de auto binne.

As jo jo fergunning opsizze wolle, bygelyks om't jo jo auto ferkocht ha, dan kinne jo dat mei email, post of oan de baly fan it Stedskantoar trochjaan. Tefolle betelle parkearbelesting krije jo werom, mei in minimum út te kearen bedrach fan € 6,00. It opstjoeren fan allinne in restitúsjeformulier is net genôch om jo fergunning te beëinigjen.

pdf Restitutieformulier (PDF, 96.11 KB)

As jo jo ferhuzing trochjûn ha oan de ôfdieling Boargersaken krije wy dêr automatysk in melding fan. Jo krije fan ús berjocht op it stuit dat wy jo ferhuzing ferwurke ha binnen it parkearsysteem.

Wenje jo yn Grou, stjoer dan in mail nei vergunningen@leeuwarden.nl of nim kontakt op mei de gemeente Ljouwert. De oanfraach foar in parkearfergunning -of ûntheffing is spitigernôch noch net digitaal mooglik.

Fan it twadde fearnsjier fan 2016 ôf kinne jo oanfragen (en wizigings) wol digitaal trochjaan.

Mei yngong fan 1 jannewaris 2016 is in nij belied fêststeld foar Grou. Dêr stean de folgjende útgongspunten yn:

• Foar it oantal parkearfergunnings dat oan bewenners fan de strjitte útjûn wurde kin, jildt – om't der net mear romte is – in spesifyk maksimum fan ien fergunning de bewenner.
• Foar de blauwe sône wurde gjin parkearfergunnings útjûn.
• Foar bedriuwen wurde gjin fergunnings útjûn.
• Bedriuwen dy't tydlik wurksumheden útfiere, kinne in saneamde tydlike ûntheffing oanfreegje. 

Ynwenners fan Grou dy't op 't heden yn besit binne fan ien of mear parkearfergunnings behâlde dy yn 2016. Hienen jo yn 2015 gjin parkearfergunning of wennen jo op dat stuit noch net yn Grou, dan falle jo ûnder it nije belied.

Foar elts adres kin ien parkearfergunning oanfrege wurde. Dêrby jildt dat jo ynskreaun stean moatte op it adres dêr't jo in parkearfergunning foar oanfreegje. Ek moat de auto op jo namme stean, útsein as der sprake is fan in lease- of bedriuwsauto. Yn dat gefal moatte jo in ferklearring wurkjouwer of leasekontrakt oerlizze.

As bewenner fan de blauwe sône yn de stêd Ljouwert kinne jo foar jo besite kraskaarten oantuge. In kraskaart jout rjocht op parkearen yn de blauwe sône, foar ien auto, sûnder dat jo gebrûk hoege te meitsjen fan jo parkearskiif. Jo kinne de kraskaarten digitaal oanfreegje mei jo DigiD en betelje fia iDeal of creditcard.

As bewenner fan de blauwe sône yn Grou kinne jo foar jo besite gjin kraskaarten oantuge.

Minimale ôfname fan 10 kaarten de kear, mei in maksimum fan 50 kraskaarten it jier it adres. De kraskaarten binne allinne jildich yn de blauwe sône dêr't jo wenje. Net-brûkte kraskaarten binne op syn heechst 3 jier jildich. In kraskaart hat altiten as eindatum 31 desimber. Dat betsjut dat as jo healweis it jier kraskaarten keapje, dy noch 2,5 jier jildich binne.

Oantúgde kraskaarten stean op de oersjochside. Op it stuit dat jo besite krije, klikke jo op de knop "wizigje" by ien fan de net-brûkte kraskaarten. Dêrnei folgje jo it stappeplan.

It is net tastien om in caravan, camper, fouwein of oanhingwein langer as trije dagen te parkearjen op de iepenbiere wei. 
Mei útsûndering fan betelle parkearplakken en parkearplakken foar fergunninghâlders. Op dy plakken meie hielendal gjin campers, caravans, fouweinen en oanhingweinen parkeard wurde. Yn de gemeente Ljouwert is it ferbean om in oanhingwein, foarsjoen fan reklame, te parkearjen op de iepenbiere wei.