Welkom op Leeuwarden.nl

 
 
Home
Mijn Leeuwarden
Ondernemen
Wonen
Vrije tijd

FNP: Ferbjustere oer sirkus-happening b. en w.

Bron: FNP Ljouwert   (26-09-2005)

Fragen yn it ramt fan kêst 41, lid 1 fan it reglemint fan oarder oer diskusjes tusken kolleezje en befolking yn in sirkustinte.

Rju achte Kolleezje,

Mei grutte ferbjustering liezen en hearden wy hjoed dat it kolleezje it foarnimmen hat om in ‘kolleezje-show’ te hâlden yn sirkustinten en op dy wize yn oktober mei de ynwenners fan Ljouwert yn petear gean wol. Ferbjustere omdat wy fan miening binne dat sokke jûnen nei alle gedachten tûzenen euro’s kostje sille, wylst neffens in artikel yn it Dagblad voor het Noorden fan hjoed (sjoch hjirûnder) bliken docht dat mear as de helte fan de Grinzers en Drinten muoite hat om rûn te kommen. Wy meie oannimme dat dat sjoen de sosjaal-ekonomyske situaasje net folle ôfwike sil fan de Ljouwerter situaasje. Wy tinke dat de jûnen folle goedkeaper organisearre wurde kinnen hienen troch gewoan gebrûk te meitsjen fan besteande fasiliteiten, lykas doarpshuzen en wykgebouwen. Leechdrompelige foarsjennings dêr’t de minsken út de buerten oars ek altyd byelkoar komme en dêr’t de gemeente oars ek yn petear is mei de boargers.

Mar dêrneist stelle wy fraachtekens by de nut en needsaak fan dizze sirkus-happenings. It kolleezje stekt in ôfgryslik soad tiid en jild yn PR, publisiteit en foarljochting (budzjet € 1,8 miljoen op jierbasis noch los fan Expeditie Leeuwarden) en der wurkje sa’n 17 minsken op de ôfdieling kommunikaasje. Al earder hat de FNP útsteld om kritysk nei dit budzjet te sjen om’t in soad grutte projekten al ôfrûn binne of yn de einfase sitte. Mei de organisaasje fan de sirkusshows krije wy de yndruk dat de budzjetten mear foar profilearring brûkt wurde sa krekt foar de ferkiezings as foar de projekten sels.

Fragen:

  1. Wat binne de totale kosten fan de hier fan de sirkustinten, de catering, kommunikaasje (ynklusyf advertinsjes yn kranten, eventuele spotsjes ensfh.), ynhier fan eventuele artysten en oare saken mei-elkoar fan de 2 jûnen? En hoefolle tiid wurdt hjir amtlik by benadering oan oeren ynstutsen, hoefolle jild is dêr omrekkene mei anneks (oeren x oeretaryf)?
  2. Wêrom moatte der noch ekstra sirkus-shows organisearre wurde, wylst it kolleezje mei boargerjierferslaggen, de wyklikse Huis-aan-Huis-advertinsjes, spotsjes op de radio oer de ferkearssituaasje, it byhâlden fan de ynternet-side www.leeuwarden.nl, it ferstjoeren fan parseberjochten en Expeditie Leeuwarden al in hiel soad tiid, enerzjy en jild (€ 1,8 miljoen) yn foarljochting, kommunikaasje en PR stekt?
  3. Hat it kolleezje ek oerwage om de jûnen ek gewoan yn de wykgebouwen of doarpshuzen te hâlden? Sa ja, wêrom is dêrfan ôfsjoen? Sa nee, wêrom net?
  4. Is it kolleezje har derfan bewust dat de organisaasje fan sa’n sirkus-show in negative impact op it imago fan de gemeente hawwe kin omdat it troch boargers as in djoer evenemint besjoen wurdt wylst in soad minsken problemen hawwe om rûn te kommen?
Sjoen de planning fan de diskusjes yn de sirkustinte (11 en 13 oktober) wolle wy graach dat it kolleezje ús fragen kommende moandei yn de riedsgearkomste mûnling beäntwurdet en dat it kolleezje dizze fragen fierder uterlik yn de kolleezje-gearkomste fan 11 oktober 2005 ek noch skriftlik  fêststeld.

Mei rju achtinge,

 
Sybren Posthumus,
FNP-fraksje.

« Terug naar vorige pagina       [↑] Naar boven

Print dit artikel Print dit artikel     Verstuur dit artikel Verstuur dit artikel  (pop-up)